الحل لتوحيد الشعب التونسي

  نحب نقول كلمة للناس الكل قبل مانسكر الموضوع، كان تحبو البلاد هاذي تقوملها قايمة وترجع كيما كانت ( ومانيش نحكي على فترة الزين ) بلاد وحدة وطنية وشعب يحب بعضو لازم حاجة بركا ، تنساو أحزابكم لمدة 48 ساعة وتخممو كان في هاك العلم الأحمر والأبيض واللي في وسطو نجمة ، تخممو في الزوالي اللي لتوا لا تبدلت حياتو ، تخممو كي تبداو تشقو في فطركم وفما واحد مطيش في الشارع جيعان تطلعوه للدار يتعشى معاكم ، تخممو في المريض بالمرض العضال وتواسيوه ونساندوه ، تخممو في العائلة وفي بر الوالدين ، خممو في بلاد تعبت من التهكمات والإنقسامات ، خممو في الصلح والسلام بين بعضكم ، خممو باش تمدو إيديكم ليدين بعضكم من غير تخديم مخ ، خممو باش تفسخو الماضي وتبنيو تونس جديدة بتقاليدنا القديمة اللي تربينا عليها ، خممو باش تعاونو الفقير اللي ماعندوش وتفكرو كي صارت وقت اللي واحد حل نصبة في كرهبتو وقال اللي ماعنداش ياخد بلاش ، خممو في اللي يقلكم يا كريم متاع الله وحس اللي إنت تنجم تكون الكريم متاع الله وقتها ، خممو باش ماتجريوش عالكراسي في الميترو والكار ، خممو باش ماتغشوش في السلعة كي تبداو تبيعو ، خممو باش ماتسرقوش حق عطار آخر الشهر كي هوا يعاونك ويهز معاك وذن القفة وسط الشهر ، خممو باش تحسو بالأم اللي جابت وبالأب اللي يجري ليل نهار باش يجيب لقمة لولادو ، خممو باش ماتبراكيوش العباد في الشارع وخليو العالم رايض ، خممو باش تخليو الطفلة رايضة وماتتحرشوش بيها في كل مرة ، خممو باش تنحيو الهوس الجنسي متاعكم مع الجنس الآخر ، خممو باش تعطيو حق ربي اللي هو في الأصل واجب عليكم ، خممو باش ماتكذبوش ، خممو باش ماتنافقوش ، خممو باش ماتخدموش أمخاخكم عالطرف الآخر مهما كان زوالي ولا كرزة ولا بنية ولا طفل ولا راجل ولا عزوزة ولا شايب تو وقتها البلاد هاذي تقوملها قايمة وترجع تونس اللي يجيها ملايين من سواح من العالم باش يذوق بحرها و شمسها ويتفرجو في شعبها ويروحو لبلادهم يحكيو بينا بالخير -->